Мавҷуд набудани воҳидҳои сохтори ташкилотҳои қарзии молиявӣ дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ боиси норозигии меҳмонон ва сайёҳҳони хориҷӣ гардида истодааст.

     Дар асоси талаботи Тартиби таъсиси воҳидҳои сохторӣ аз ҷониби ташкилотҳои қарзии молиявӣ ва филиалҳои онҳо, ки бо  қарори Раёсати Бонки миллии Тоҷикистон аз 29 майи соли 2019, №58 тасдиқ гардидааст, барои пешниҳоди хизматрасониҳои бонкӣ воҳиди сохторӣ дар шакли маркази хизматрасонии бонкӣ пешбинӣ шудааст, ки масоҳати он набояд аз 25 метри мураббаъ ва шумораи кормандонаш набояд аз 3 нафар кам бошад. Ташкили чунин воҳиди сохторӣ дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ қариб ғайриимкон мебошад.

     Боиси қайд аст, ки бо мақсади мусоидат намудан ба рушди соҳаи сайёҳӣ дар кишвар, беҳтар намудани дастрасии сайёҳону меҳмонони хориҷӣ ба хизматрасониҳои молиявӣ, баланд бардоштани сифати хизматрасонии бонкӣ, зиёд гардонидани дастрасии аҳолӣ ба хизматрасониҳои молиявӣ ва таъсиси ҷойҳои нави корӣ, зарурати аз нав таъсис ва ба танзим даровардани фаъолияти нуқтаҳои хизматрасонии хазинавии ташкилотҳои қарзии молиявӣ ба миён омадааст.

     Инчунин, ворид намудани тағйиру иловаҳо ба Тартиби таъсиси воҳидҳои сохторӣ аз ҷониби ташкилотҳои қарзии молиявӣ ва филиалҳои онҳо, ки қаблан бо ҳамин санад иҷозати таъсиси нуқтаҳои хизматрасонии хазинавӣ дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ бо доираи амалиёти хариду фурӯши асъори хориҷӣ, ивази асъорҳо, майда кардани асъор ва ивази асъори фарсуда танзим гардида буд, барои дастрас ва содда гардонидани хизматрасониҳои бонкӣ барои аҳолӣ пешбинӣ шудааст.

     Мақсад аз дахолати давлат, яъне ворид намудани тағйиру иловаҳо дар Тартиби мазкур мусоидат намудан ба рушди соҳаи сайёҳӣ дар кишвар, беҳтар намудани дастрасии сайёҳону меҳмонони хориҷӣ ба хизматрасониҳои молиявӣ, баланд бардоштани сифати хизматрасонии бонкӣ, зиёд гардонидани дастрасии аҳолӣ ба хизматрасониҳои молиявӣ, махсусан амалиёти мубодилавӣ ва таъсиси ҷойҳои нави корӣ мебошад.

     Дар доираи тағйиру иловаҳо дар Тартиби мазкур чораҳои зерин пешбинӣ карда мешаванд:

• Тартиби кушодан ва талабот нисбат ба нуқтаҳои хизматрасонии хазинавии ташкилотҳои қарзии молиявӣ;
• Номгӯи хизматрасониҳое, ки нуқтаҳои хизматрасонии хазинавӣ пешниҳод менамоянд.

     Бо мақсади ҳалли мушкилоти зикргардида (набудни воҳидҳои сохтории ташкилотҳои қарзии молиявӣ дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ, аз тарафи Бонки миллии Тоҷикистон корҳои зерин анҷом дода шуданд:

• Тавсия додан ба ташкилотҳои қарзии молиявӣ ҷиҳати кушодани воҳидҳои сохтории ташкилотҳои қарзии молиявӣ, аз ҷумла маркази хизматрасонии бонкӣ дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ;
• Насб намудани таҷҳизоти техникии худкор, ки дорои имконияти анҷомдиҳии амалиёти мубодилавӣ мебошанд дар меҳмонхонаҳо, фурудгоҳҳо, осоишгоҳҳо ва дидбонгоҳҳои гумрукӣ аз тарафи ташкилотҳои қарзии молиявӣ;

     Бо вуҷуди аз тарафи Бонки миллии Тоҷикистон андешида шудани чорахои зикршуда бо ташкилотҳои қарзии молиявӣ, проблемаи мазкур хамоно ҷой дорад. Аз ин лихоз, ягона рохи бартараф намудани он дар ворид намудани тағйиру иловаҳо ба Тартиби мазкур дида мешавад.

Ворид ва тасдиқ намудани тағйиру иловаҳо ба Тартиби мазкур аз буҷети давлатӣ ягон хароҷотро талаб наменамояд.

Қабули санади меъёрии ҳуқуқии мазкур боиси оқибатҳои зерин мегардад:

1) оқибатҳои иҷтимоӣ:

- ба рушди соҳаи сайёҳӣ дар кишвар, беҳтар намудани дастрасии сайёҳону меҳмонони хориҷӣ ба хизматрасониҳои молиявӣ, баланд бардоштани сифати хизматрасонии бонкӣ, зиёд гардонидани дастрасии аҳолӣ ба хизматрасониҳои молиявӣ, махсусан амалиёти мубодилавӣ ва таъсиси ҷойҳои нави корӣмусоидат менамояд;

- барои дастрас ва содда гардонидани хизматрасониҳои бонкӣ барои аҳолӣ мусоидат менамояд;

- сифати хизматрасониии бонкӣ беҳтар мешавад;

- боваринокии аҳолӣ ба низоми бонкӣ зиёд мегардад.

2) оқибатҳои иқтисодӣ:

- барои ташкилотҳои қарзии молиявӣ манбаи иловагии даромад пайдо мешавад;

- вазъи молиявии ташкилотҳои қарзии молиявӣ беҳтар мегардад.