Дар натиҷаи рушди босуръати технологияҳои пардохтӣ ва тағйирёбии талаботи бозор, зарурат ба такмили низоми барориши кортҳои пардохтӣ, тавсеаи доираи истифодаи онҳо, таҳкими чораҳои амниятӣ ва ба талаботи муосир мутобиқ намудани хизматрасонии кортҳои пардохтии бонкӣ ба миён омадааст. Дастурамали мавҷудаи №190 баъзе аз талаботи муосири иқтисоди рақамиро, аз қабили истифодаи технологияҳои нав (токенизатсия, пардохтҳои бидуни тамос), стандартҳои байналмилалии амният (PCI DSS, EMV) пурра фаро намегирад. Инчунин, дар дастурамал тартиби барориш ва хизматрасонии кортҳои маҷозӣ ва кортҳои иттиҳодиявӣ ба таври қофӣ шарҳ дода нашудааст. Аз ин лиҳоз, зарурати ворид намудани тағйиру иловаҳо ба Дастурамали амалкунанда ба миён омадааст.

   Дар сурати андешида нашудани чораҳо, хавфи афзоиши ҳолатҳои қаллобӣ, сустшавии сатҳи муҳофизати истеъмолкунандагон, монеаҳои ҳуқуқӣ барои рушди тенологияҳои муосир, аз қабили кортҳои пардохтии маҷозӣ ва токенизатсияи кортҳои пардохтӣ, хавфи истифодаи нодурусти кортҳои иттиҳодиявӣ барои сарпечӣ аз андоз ва назорати молиявӣ, ва номувофиқатии талаботи ҳуқуқӣ бо воқеияти амалӣ ва техникӣ боқӣ мемонад.

   Мақсади дахолати Бонки миллии Тоҷикистон дар робита ба мушкилоти мазкур баланд бардоштани самаранокии хизматрасонии бонкӣ тавассути кортҳои пардохтии бонкӣ, таҳкими механизмҳои амнияти молиявӣ, ҳифзи манфиатҳои муштариён ва мутобиқсозии тартибот бо стандартҳои байналмилалӣ мебошад.

   Дар лоиҳаи пешниҳодшуда дароз намудани муҳлати эътибори кортҳои беном, тавсеаи имконоти истифодаи кортҳои маҷозӣ, муқаррар намудани талаботи муфассал оид ба кортҳои иттиҳодиявӣ, таҳкими расмиёти дохилии амнияти иттилоотӣ, риояи стандартҳои байналмилалии PCI DSS ва EMV, тартиби ҳамгироии кортҳои пардохтӣ бо замимабарномаҳои мобилӣ ва татбиқи расидҳои электронӣ пешбинӣ карда мешавад.

   Бонки миллии Тоҷикистон вобаста ба масъалаҳои алоҳида, ки ҳангоми барориш ва хизматрасонии кортҳои пардохтии бонкӣ сар мезананд, ба ташкилотҳои қарзии молиявӣ мактубҳои иттилоотӣ ва дастурӣ ирсол намудааст. Аммо бинобар сабаби бо суръати баланд рушд кардани технологияҳои пардохтӣ ва рӯз аз рӯз зиёд шудани шумораи ташкилотҳои қарзии молиявӣ чунин чораҳо натиҷаи дилхоҳ намедиҳанд.
   Ворид намудани тағйиру иловаҳо ба Дастурамали №190 "Дар бораи тартиби хизматрасонӣ тавассути кортҳои пардохтии бонкӣ" самараноктарин роҳи ҳалли мушкилот ва расидан ба мақсадҳои гузошташуда мебошад, зеро он низоми ягона ва устувори танзимро таъмин мекунад.

   Қабули қарори мазкур хароҷоти мустақимро аз буҷети давлатӣ талаб намекунад. Бо вуҷуди ин, татбиқи он метавонад хароҷоти муайянро ҷиҳати такмили инфрасохтори пардохтии ташкилотҳои қарзии молиявӣ ба миён орад.

   Оқибатҳои иҷтимоию иқтисодӣ:

• иҷтимоӣ: афзоиши дастрасии аҳолӣ ба хизматрасониҳои пардохтӣ, баланд шудани сатҳи огоҳии муштариён дар бораи пардохтҳои ғайринақдӣ, коҳиши хавфи қаллобӣ ва беҳтар шудани эътимоди мардум ба низоми бонкӣ.
• иқтисодӣ: рушди иқтисоди рақамӣ, афзоиши пардохтҳои ғайринақдӣ, коҳиши иқтисоди пинҳонӣ ва баланд шудани рақобатпазирии низоми бонкии Тоҷикистон дар арсаи байналмилалӣ.