Санаи 22 июни соли 2023 Қонуни Ҷумҳурии Тоҷикистон “Дар бораи низоми иҷозатдиҳӣ” дар таҳрири нав қабул гардид, ки раванди гирифтани иҷозатнома ва ҳуҷҷатҳои иҷозатдиҳиро боз ҳам соддатар ва осонтар гардонид.

    Вобаста ба ин зарурат пеш омадааст, ки талаботи “Тартиби гирифтани иҷозатнома барои фаъолияти оператори низоми пардохтӣ” ба талаботи қонуни мазкур мутобиқ гардонида шавад. Аз ҷумла, дар “Тартиби гирифтани иҷозатнома барои фаъолияти оператори низоми пардохтӣ” тартиби ба таври электронӣ қабул намудани ариза,  азнавбарасмиятдарорӣ, додани нусха (дубликат) ва бекор кардани амали иҷозатнома, инчунин пардохти хироҷи ҳарсола барои нигоҳ доштани эътибори иҷозатнома пешбинӣ нагардидааст. Айни ҳол, аз ҷониби Бонки миллии Тоҷикистон ба шахсони ҳуқуқӣ 10 иҷозатнома барои фаъолияти оператори низоми пардохтӣ дода шудааст.

    Дар ҳолати ворид накардани тағйиру иловаҳои дахлдор ба санадҳои меъёрии ҳуқуқӣ эҳтимолияти он вуҷуд дорад, ки шахсони ҳуқуқӣ ҳангоми ба таври электронӣ пешниҳод намудани ариза, азнавбарасмиятдарорӣ ва гирифтани нусха (дубликат)-и иҷозатнома, инчунин анҷом додани пардохти хироҷҳои дар қонунгузорӣ пешбинишуда ба мушкилии ҳуқуқӣ дучор оянд.

    Бонки миллии Тоҷикистон ҳамчун мақомоти иҷозатдиҳанда дар соҳаи низоми пардохтӣ бо мақсади содда ва шаффоф намудани раванди додани иҷозатнома барои фаъолияти оператори низоми пардохтӣ ва мутобиқ намудани санади меъёрии ҳуқуқӣ ба талаботи қонунгузории Ҷумҳурии Тоҷикистон лоиҳаи қарори мазкурро таҳия намуд.

    Дар доираи лоиҳаи қарори мазкур масъалаҳои зерин мавриди танзим қарор мегиранд:

• тартиби ба таври электронӣ пешниҳод намудани ариза барои гирифтани иҷозатнома;
• тартиби азнавбарасмиятдарорӣ иҷозатнома;
• тартиби додани нусха (дубликат)-и иҷозатнома;
• тартиби бекор кардани амали иҷозатнома;
• тартиби пардохти хироҷи ҳарсола барои нигоҳ доштани эътибори иҷозатнома.

    Ба ҷуз ворид намудани тағйиру иловаҳо ба қарори болозикр дигар роҳи ҳал кардани мушкилиҳо вуҷуд надоранд, зеро маҳз қарори Раёсати Бонки миллии Тоҷикистон аз 31 марти соли 2017, №23 “Дар бораи  Тартиби гирифтани иҷозатнома барои фаъолияти оператори низоми пардохтӣ” санади меъёрии зерқонунӣ буда, тартиби гирифтани иҷозатномаро барои анҷом додани фаъолияти оператори низоми пардохтӣ аз ҷониби шахсони ҳуқуқӣ (ташкилотҳои қарзии молиявӣ ва шахсони ҳуқуқие, ки ташкилотҳои қарзии молиявӣ намебошанд),  барасмиятдарорӣ ва тартиби бозхонди иҷозатномаро муқаррар менамояд.

   Ворид намудани тағйиру иловаҳо ба Тартиби мазкур аз буҷети давлатӣ хароҷоти иловагӣ талаб намекунад.